Har bir ayolni tashvishga soladigan bu muammoga qarshi Har birimiz o`zimiz bilgan choralarni qo`llaymiz. Kimdir kremlarni samaraliroq deb hisoblasa, boshqalar lazer nurlarini afzal ko`rishadi. Tajribali kosmetolog Mahbuba Mamanova esa sizga qadimiy, biroq tobora “yosharib” borayotgan muolajani tavsiya qiladi. Axir uning samarasi yillar davomida sinlagan-da! 

Avval anatomiya

Teri ostida mushaklar joylashganligini anotomiya fanida o`rganganmiz. Va teri shu mushaklarga yopishib turishidan ham xabarimix bor. Yosh o`tgani sari yoki kamharakatlilik tufayli mushaklarning hajmi qisqara boshlaydi. Natijada ularga yopishgan teri ham burishib qoladi. Shu tariqa ajinlar yuzaga keladi. Bu jarayonni imkon qadar sekinlashtirish uchun esa mushaklar qisqarishining oldini olishga harakat qilish darkor. Bilamizki, tanadagi mushaklar jismoniy mashqlar tufayli kattalashadi, o`sadi. Yuzdagilarini esa uqalash yordamida o`z holicha saqlab turish mumkin. Bundan tashqari yuzdagi shishlar va ko`z ostidagi qopchalardan xalos bo`lishda, shuningdek, qon teri rangini tiniqlashtirish uchun ham aynan uqalash muolajasi tavsiya etiladi.

Nahotki, natija vaqtinchalik?

Muolajadan keyin ayollar “Dastlab foydasi bo`ladi-yu, keyinchalik teri avvalgi holiga qaytib qoldi-da” deya nolishadi. Yoki mushaklar “erinchoq” bo`lib qolishidan hadiksirashadi. Yuqorida uqalash muolajasini jismoniy mashqlarga qiyosladik. Ma`lumki, sport bilan bir kungina shug`ullansangiz, bir necha kungacha tetik yurasiz, xolos. Keyin bari dastlabki holiga qaytadi. Uqalashda ham xuddi shunday. Bir martalik muolaja bilan to`y va tadbirlaringizni o`tkazib olishingiz mumkin, lekin davomiy natijaga erisha olmaysiz.

Yosh ham ahamiyatga ega

Agar mutaxassis uqalash texnikasini to`g`ri tanlasa, yoshga doir chegaralar yo`q. Shunday bo`lsa-da, ko`pgina kosmetologlar uqalashni birinchi ajinlar paydo bo`ladigan davr, 30 yoshdan keyingina boshlashni samarali deb hisoblashadi.

Qancha davom etadi?

Jarayonning necha soat davom etishi tanlangan texnikaga bog`lik. Masalan Jake usulida uqalash 15-30 daqiqa davom etsa, 1-1,5 soatlik amaliyotlar ham mavjud. Biroq odatda 30-45 daqiqa etarli hisoblanadi. Uqalashni yilda bir-ikki kurs (10-15 martadan) takrorlab turish maqsadga muvofiq sanaladi.

Qay turi kimga mos?

Bugungi kunda yuz, bo`yin va bo`yin atrofi sohasini uqalashning ko`plab turlari mavjud. Shulardan keng tarqalganlari klassik, plastik va Jake uslubidagi uqalash hisoblanadi. Klassik va plastik uqalash ma`lum harakatlar jamlanmasini takrorlash bo`lib, umumiy holatni yaxshilashga yo`naltirilgan. Bundan tashqari muammoning turiga qarab, alohida uqalash turlarini ham tanlashingiz mumkin. Masalan, yuzdagi shish va ko`z osti qopchalaridan xalos bo`lish uchun limfodrinaj, husnbuzar va uning asoratlarini davolash uchun Jakega murojaat etgan afzal. Uqalash turini mutaxassis bilan maslahatlashgan holda tanlagan ma`qul.

Muolajadan keyin husnbuzar...

Muolaja davomida foydalaniladigan vositalar(krem, gel, yog`lar)ni teriga mos turi tanlanmasa, aytaylik yog`li teri uchun haddan tashqari yog`li, yoki quyuq vosita qo`llanilsa, teri katakchalari to`lib, turli toshma va xusnbuzarlarga sabab bo`lishi mumkin.

Botoksdan so`ng qo`llasa-chi?

Botulotoksin in`eksiyasi uqalash muolajasi uchun qarshi ko`rsatma emas. Ignali muolajadan bir oy o`tgach uqalashni amalga oshirish mumkin. Biroq bu mijoz uchun natijani chippakka chiqarish bilan barobar. Chunki uqalash qon aylanishni yaxshilaydi va preparatning singishini tezlashtiradi. Shuning uchun avval uqalash amaliyotini o`tkazib, keyin boshqa muolajalarni qo`llash tavsiya etiladi.

Eslatma!

Garchi uqalash juda samarali va foydali muolaja bo`lsa-da, juda chuqur ajinlardan xalos etishga qodir emas. Yanayam aniqrog`i, undan mo``jiza kutmang! Agar ajinlar chuqur joylashgan bo`lsa, kosmetologiyaning yanada samarali usullarini qo`llashingiz mumkin. Noto`g`ri amalga oshirilgan uqalash muolajasi qon tomirlari va limfa tizimiga ziyon etkazishini inobatga olgan holda, tajribali va sinalgan mutaxassisga murojaat qilishni tavsiya etamiz.

Qarshi ko`rsatmalar

Tana harorati ko`tarilganida, teri kasalliklari avj olganida, onkologik va yurak qon-tomir xastaliklari hamda yuz terisidagi har qanday shilinishda uqalash amaliyotini o`tkazish mumkin emas.

KAMOLA tayyorladi.