 Go`zal, oqila, ishda, ilmda katta muvaffaqiyatlarga erishgan, fe`li ham ajoyib, ammo… yolg`iz! Sizning tanishlaringiz orasida ham shunday qizlar bordir? Xo`sh, u nega shu paytgacha yolg`iz, nega baxti hech ochilmaydi? Siz kelin qilish umidida qiz qidirganlarga uning manzilini berasiz, yaxshi yigitlar bilan tanishtirib qo`yasiz, biroq bari befoyda. U negadir nomzodlarni o`zidan nari itarayotgandek yoki nimasi bilandir cho`chitayotgandek. Xo`sh, muammo nimada? Ruhshunoslar fikricha, bunday qizlar bir necha toifaga bo`linar ekan.
1-toifa: QIROLIChA
Shohsanam bir qarashda kishida yaxshi taassurot qoldiradi. Chiroyli, ochiqko`ngil, kirishimli, quvnoq va bama`ni qiz. Bundan tashqari, havas qilsa arzigulik kelin bo`lishi mumkin: mashinasi, kvartirasi bor, oliy ma`lumotli, yaxshi ishda ishlaydi, ziyoli oilada tarbiya topgan. Shunga qaramay, yoshi 28 ga chiqsa hamki hamon oila qurmagan. Hatto shu paytgacha birovdan sevgi izhori ham eshitmagan ekan. Umuman olganda, Shohsanamning o`zi uncha-muncha yigitni nazariga ilmasligi hech kimga sir emas. U bo`lajak turmush o`rtog`iga qo`yadigan shartlarni eshitib, nega yigitlar bu qizdan bir chaqirim narida yurishlarini tushunsa bo`ladi. Ya`ni bo`lajak kuyov ichmasin, chekmasin, yaxshi pul topsin, uni qattiq sevsin va Shohsanamdan har tomonlama «bir kalla baland bo`lsin» emish. Bordiyu talabgor yigit bu talablardan birontasiga ozgina bo`lsa-da javob bermaslikka jur`at etsa, mag`rur qirolichamiz qoshlarini chimirib, sho`rlikni «brak»ka chiqaradilar. Qiziq, unga bunday «shahzoda»ni qaerdan topamiz? Ular faqat kinolarda bo`ladi axir!
Aslida bunday qizlarga erning keragi yo`q, deyishga shoshilmang. Biz bilamiz, Shohsanam ham hamma qizlar qatori oila qurishni, farzandli bo`lishni orzu qiladi. Ammo bu orzusi tomon bir qadam ham tashlagisi, o`ziga xayolan yaratib olgan idealidan oz bo`lsa-da voz kechgisi yo`q.
Siz shunday toifaga kirasiz, agar mana bunday bo`lsangiz:
- hammani bo`lar-bo`lmasga tanqid qilaverasiz;
- murosa qilishni bilmaysiz;
- mulohazalaringiz qat`iy va keskin;
- o`zingizni doimo haq deb bilasiz;
- ko`pincha siz bilan yaxshi muloqot boshlagan insonlarning vaqt o`tgani sayin sizdan o`zlarini olib qochishlarini sezasiz;
- hazilni ko`tara olmaysiz.
Nima qilmoq kerak?
Birinchi navbatda g`ururni bir chetga surib qo`yib, dugonalaringiz, yaqinlaringizdan sizni yaxshilab tanqid qilishlarini so`rang. So`ng ularga diqqat bilan quloq soling, gaplarini bo`lmang va bahslashmang. Tanqidlarni inobatga olishga harakat qiling. Yigit bilan uchrashganda uning kamchiliklariga emas, fazilatlariga e`tibor qarating. Ko`proq tinglashni va bo`lar-bo`lmasga bahslashavermaslikni o`rganing. Atrofingizdagilar haqida yomon gapirmang. Qisqasi, tojingizni echib turing, qirolicham!
2-toifa: NAZORATChI
«Azizim, bugun konsertga boramiz-a, unutmadingizmi? Soat nechadaligini esdan chiqarmagandirsiz? Konsert zali qaerda joylashganini bilasizmi? Iltimos, kech qolmang, uydan vaqtliroq chiqing. Qani, hammasini bir boshdan takrorlang-chi: qachon, qaerda, soat nechada uchrashamiz? Baqirmang, men nima qildim sizga?!» Sevara besh yashar bola yoki shaharga yangi kelgan muhojir bilan konsertga tushmoqchi, deb o`yladingizmi? Yo`q, aslo. Uning sobiq (!) qallig`i kap-katta yigit, shaharning yarmini mashina moylari bilan ta`minlaydigan firma boshlig`i edi. Ammo, afsuski, to`y bo`lmadi. Chunki uni yosh bola deb hisoblayotgan, ishonmayotgan, suyanmayotgan, aksincha o`zini nazoratchi onadek tutayotgan qizga uylanishni kim ham istardi?! Sevaraning hamma narsani nazorat qilaverish odati yoshligidan unga pand berib keladi, ammo qiz tushmagur buni tan olishni istamaydi. Tarki odat — amri mahol, deganlari shu bo`lsa kerak. Fotiha buzilgach, qiz sho`rlik «bevafo», «yaxshilikni bilmaydigan» yigitni qarg`ab, rosa ko`z yosh to`kdi. Ammo endi bari befoyda edi.
Siz shunday toifaga kirasiz, agar mana bunday bo`lsangiz:
- hamma narsani nazorat qilaverasiz;
- «buni mendan boshqa hech kim qila olmaydi», deb o`ylaysiz;
- uchrashuv vaqti va joyini kunda bir necha bor aniqlashtirishdan charchamaysiz;
- uchrashuvga yigitning kech qolishini kechirib bo`lmas gunoh hisoblaysiz;
- erkaklarni yosh bola deb o`ylaysiz.
Nima qilmoq kerak?
«Bor-ey!» deb hammasini o`z holiga tashlab qo`ying. Yigitingiz konsertga chipta topa olmasligiga 100 foiz ishonsangiz ham, unga imkon bering. Balki sizni lol qoldirib, oldingi qatorga chipta olib kelar! Xo`p, siz nazorat qilmasangiz, hech bir ish hal bo`lmaydi. Xo`sh, nima qilibdi? Shuning uchun sevimli insoningiz bilan munosabatlaringizni qurbon qilish aqldanmi? Bir martagina bo`lsa-da mas`uliyatni yigitning zimmasiga yuklang. Kim biladi, bu keyin o`zingizga ham yoqib qolar.
3-toifa: «ERSIZ QOLMASAM BO`LDI!»
Dilnoza qizaloqligidanoq kelin bo`lishni orzu qilardi. Boshqa qizlarga o`xshab «shifokorlik kasbini tanlayman» yoki «katta o`qishda o`qiyman» demasdi, faqat «kelin bo`laman» derdi. Chiroyli liboslarda erini kutib olishini, unga shirin taomlar pishirib, bir etak bola tug`ib berishini o`ylab katta bo`ldi. Aksiga olib, baxt kutganingda kelmaydi. Dugonalari o`qishni bitirib, turmushga chiqib ketishdi. U esa yoshi 25 ga chiqdi hamki, orzu qilgani — oq ko`ylak va Limuzin unga yaqin kelay demayapti. Kaddi-basti kelishgan, yuzlari oyday, bir xonadonni guldek yashnatadigan qiz hamon boshqalarning to`yida kelinlarga havas va hatto hasad bilan qarashdan nariga o`ta olmayapti. Shu paytgacha chiqqan uchrashuvlariyu ko`rgan yigitlarining sanab, adog`iga etib bo`lmaydi. Yigitlarga ortiqcha talab ham qo`ymaydi. Shunchaki, uyim-joyim deydigan bo`lsa, kifoya. Ammo yigitlar negadir uni tanlashmayapti. Aynib ketgan sovchilardan birining orqavarotdan aytishicha, Dilnoza ikkinchi uchrashuvdayoq o`zini yigitning xotinidek tuta boshlabdi. Uchrashuvning ertasiga yigitga qo`ng`iroq qilib, dorilarini ichgan-ichmaganini so`rabdi, istasa, yigit bilan birga bozorga tushib, unga kiyim tanlashda yordamlashishi mumkinligini ham aytibdi. Hozirdanoq qizning o`zini bekadek tutayotganidan cho`chigan yigit orqasiga qaramay qochvoribdi.
Siz shunday toifaga kirasiz, agar mana bunday bo`lsangiz:
- har bir yigitga bo`lajak turmush o`rtog`ingiz sifatida qaraysiz;
- yigit nimadan gap ochmasin, mavzuni to`y va ro`zg`or tashvishlariga burasiz;
- o`zingizning ajoyib beka bo`lishingizni bo`lar-bo`lmasga ko`z-ko`z etaverasiz;
- uning pullarini tejamoqchi bo`lasiz.
Nima qilmoq kerak?
Avvalo, kelajakka doir aniq rejalar tuzib, har bir yigitga bo`lajak erdek qarashni bas qiling. Qiziqishlaringiz doirasini kengaytiring, biror foydali mashg`ulot bilan shug`ullaning, kasb o`rganing, xullas, «nima bo`lsa ham erga tegish» fikridan biroz chalg`ing. Tanishgan yigitingizning shaxsiy hayotiga darhol aralashib, unda tartib o`rnatishga kirishib ketmang. Siz hozircha uning hayotida shunchaki bir mehmonsiz. Yigit sizni shunchaki ko`rmoqchi, sinamoqchi, aslida qanday ekanligingizni bilmoqchi. Hech qachon to`y, ro`zg`or, birgalikdagi hayot mavzulariga sha`ma ham qilmang. Aksincha, o`zingizni erkin tuting, xuddi oila qurish sizga emas, unga kerakdek.
4-toifa: OG`ZI KUYGAN QATIQNI HAM PUFLAB IChAR
Karima yigitlarga ishonmay qo`ygandi. Chunki talabalik davrida tanishib, sevishgan yigiti Ravshan to`rt yil uning qo`ynini puch yong`oqqa to`ldirib yurib, oxiri boshqaga uylanib ketdi. Keyin qizni sovchilar orqali bir yigitga unashtirishgandi, bo`lajak kuyovning giyohvandligi ma`lum bo`lib, to`y buzildi. Shundan so`ng Karima o`z qobig`iga o`ralib olib, hech bir yigitni yaqiniga yo`latmaydigan bo`lib qoldi. Oradan ma`lum fursat o`tgach, yaralar o`rni bitib, qiz yana oila qurish, farzandli bo`lish haqida o`ylay boshladi. Ammo endi har bir yigit uning ko`ziga aldoqchi, giyohvand, ichkilikboz bo`lib ko`rinardi.
Siz shunday toifaga kirasiz, agar mana bunday bo`lsangiz:
- oilangizda muammolar ko`p;
- yaxshi yigitlar ham borligiga ishonmaysiz;
- ertami-kech sizni baribir aldab ketishlariga aminsiz;
- imkon bo`lishi bilan yigitingizning cho`ntagi, telefoni va hatto elektron pochtasini ham tekshirmoqchi bo`lasiz.
Nima qilmoq kerak?
Avvalo, yaxshi narsalardan ibrat olishga intiling. Tanish-bilishlaringiz orasida baxtli oila qurganlar yo`qmi? Bo`lsa kerak, faqat yaxshilab qarang. Ularga baxt kulib boqibdimi, demak, sizga ham kulishi tayin. O`zingizning bu qadar badgumonligingiz sababini anglashga harakat qiling. Insonlarga, xususan, yigitlarga ozgina bo`lsa-da, ishonishni o`rganing. Unutmang, insonga ishonmasangiz, u ko`nglingizning taqa-taq yopiq eshigini chertaverib, oxiri charchashi va bir kuni sizning eng yomon shubhalaringizni tasdiqlay boshlashi mumkin.
Shahnoza SOATOVA
|
