![](/_nw/0/88039114.jpg) — Uch ammam bor. Ularni yaxshi ko`raman. «Onamdan qolgan yodgorlarim» deb dadam ham jigarlarini juda ardoqlaydi. Ammo onam va ammalarim o`rtasidagi sovuq munosabat meni xafa qiladi. Chunki ular uyimizga kelishsa, albatta, onamning ko`nglini og`ritib ketishadi. Qarindoshlarimiznikida yig`in yoki tadbirlar bo`lsa, volidamni yakkalab qo`yishadi. Bir kuni xolamning tobi qochib, uyimiz yaqinidagi shifoxonada davolana boshladi. Onam «Uzoqdan qatnab, qiylanib yurasizmi», deya xolamni ikki kun uyimizda qolishga ko`ndirdi. Bu gap ammamning qulog`iga qaerdan chalingan bilmayman, uyimizga kelib, katta janjal ko`tardi. Otam ammamning, onam xolamning tarafini oldi. Shundan buyon hammamiz qandaydir tushkun kayfiyatda yuribmiz. Men onam bilan ammam yuzko`rmas bo`lib ketishlarini xohlamayman. Ularni ko`rib, biz — opa-ukalar ham kelajakda bir-birimizga shunday bemehr bo`lib qolmasmikinmiz deb xavotirlanyapman.
Z.N., 16 yosh, Toshkent shahri
Qaynonajon: — Bolajonim, kattalar o`rtasida ba`zida mana shunday tushunmovchiliklar ham bo`lib turadi. «Aqlni aqlsizdan o`rgan» degan maqol bor-ku, siz ham qarindoshlaringiz o`rtasidagi kelishmovchiliklarni ko`rib, aka-ukalaringiz bilan yanada ahil yashashga harakat qiling. Yana bir gap, onangizga ammalaringizdan nolimang. Yaxshisi, muammolariga aralashmang, aksincha o`rtada ko`prik bo`ling. Ammalaringizning hurmatini joyiga qo`ying.
Ammajonlarga aytar so`zim: boshingizga tashvish tushganda ham, erta bir kun el-yurtga to`y-tomosha berganingizda ham, aka-ukalaringiz, jigarlaringiz yordamga keladi. Shuning uchun ularning tinchini buzmang. Keliningizni ukangizning ayoli, jiyanlaringizning onasi sifatida ardoqlang. Іatti-harakatlaringiz bilan yoshlarda noto`g`ri taassurot qoldirmang.
Feruza Akromova, ruxshunos: — Singiljonim, siz o`smir yoshdasiz. Balkim, katta deb o`ylayotgan muammongiz oddiygina kelishmovchilikdir. Ushbu vaziyatda kattalarning munosabatlariga aralashadigan bo`lsangiz, nizolar yanada chuqurlashib ketishi mumkin. Onangizning ko`nglini o`ylayotganingizni ham tushunaman. Ammo bu muammolarni ularning o`zlari hal qilgani ma`qul. Bo`layotgan voqealardan to`g`ri xulosa chiqaring.
Saodat Ochilova yozib oldi.
|