![](/_nw/0/27641037.jpg) Ayol makri qirq tuyaga yuk bo`ladi.
Nahot o`sha “tuyalar” ustiga nima ortilganini bilmasa?!
Erkak yuragini zabt etish degani chakana ish emas. Turmush qurib ham hech charchamadingiz-da. Qurg`ur eringiz ham o`zingizdan badtar chiqdi. Orqavorotdan u haqida hamma biladigan, birgina sizga noma`lum ma`lumotlarni eshitganda, ayniqsa, ahvolingizni tasavvur qilish qiyin emas. Siz o`qimagan psixologik kitob, er-xotin munosabatlari haqidagi risolalar, bormagan folbin, ekstrasens qolmadi. Faqat 4 sir bor.
O`g`rini qaroqchi ursa...
Siz yoqtiradigan psixologlarning aytishicha, ayollar uchun erkaklarni rom etish haqidagi maqolalarni ularning o`zlari ham maza qilib o`qisharkan. Superizquvar bo`lib topgan informasiyalaringiz o`zingizga qarshi ishlashi mumkin, bu doim yodingizda bo`lsin. Agar qo`lingizni so`rayotgan yigit istaklaringizni chaqqon bilib olaversa, shilq etib tushishga shoshilmang. Hamma narsa tahlilda bilinadi. “Ko`ngilni ovlash” chinakam sevgiga aylanishini xohlasangiz, birinchi uchrashuvdayoq “tumshug`ingizdan ilinmang”.
Biz va mayda-chuydalar
Erkaklar ayollarning mayda-chuydalar ustida soatlab bosh qotirishlarini tushunishmaydi. Do`konga chiqish uchun soch tarash, labga bo`yoq surtishing shartmi, degan gaplarni birinchi marta o`qimayotgan bo`lsangiz kerak. Lekin bu erkaklarning o`zi bunday odatlardan holi degan ma`noni bildirmaydi. Erkakning oldi tor, orqasi keng, deganlari rost. Faqat ular o`zlaridagi kichkina kamchiliklarini yashirishga usta bo`lishadi. Oshkor qilinmagan emosiyalar beiz ketmaydi. Qo`ng`irog`ingizga javobsiz qolsa, SMSlar uvol ketaversa, bilingki, u nimadandir ranjigan. Vaqtida alamlar zahrini ketkazish turmushingizning uzoq va farovon bo`lishini ta`minlaydi.
“Ko`nglimda bir yor, qo`ynimda ham o`zi”
Erkaklar ko`pxotinlilik haqida qancha og`iz ko`pirtirishmasin, erkinlikka intilishmasin, asli bundan o`lgudek qo`rqishadi. Bir narsani bilib qo`ying: erkak kishi g`ururini qattiq asraydi. O`zi hiyonat ko`chasiga kirsayu, xotini undan qasos olishini faraz qilishning o`zidayoq erkakning tepa sochi tikka bo`ladi-qoladi. Shuning uchun bu qabilidagi gaplarni yurakka yaqin olib, qovoq-tumshuq qilib yurmang.
Yaqinlashish siri
Haqiqat shundaki, erkaklar uchun ayollar bilan munosabatda jinsiy va ruhiy yaqinlik o`rtasida farq bor. Ayollar esa sevgani uchun ba`zan hamma narsaga tayyor bo`lishadi. Ammo muhabbat bobida jabrdiyda statusi ko`pam yaxshilikka olib kelmaydi. Ayol turmushga chiqish oldidan bo`lajak erini sevish-sevmasligi haqida o`ylasa, erkak esa bu haqda birinchi kechadan keyin bir qarorga kelishi mumkin. Ayollarning sevib qolishlari oson, dil izhori qilishlari qiyin. Erkaklarning sevgi izhori qilishlari oson, ko`ngil berishlari qiyin. Erkaklar,odatda, o`zlari hurmat qiladigan ayolni sevishadi, ayollar esa faqat sevgan odamlarini hurmat qilishadi. Bor qarama-qarshilik ham shunda.
Dilnoza Umarova
|